Green Revolution

Some Are Smarter Than Others

GREEN REVOLUTION

Minsa'y pumasok ang kuya Andoy sa Bulacnin Elementary School kung saan siya ay guro at nakita nya ang kanyang mga co-teachers na nagkukuwentuhan at nagtatawanan malapit sa kanyang garden plot.

Kuya Andoy  :    Ano ga namang aga nyang huntahan at halakhakan nyong iyan?
Teachers       :  Ala'y maestro Andoy, natatawa lang kami sa Garden Plot mo. Punong puno ng damo at talahib hahahaha!
Kuya Andoy  :  Ay ano ga'ng pakailam nyo?
Teachers       :  Aba maestro,hindi mo ga alam na darating ang mga taga kagawaran ng agrikultura bukas ng umaga para sa programang green revolution ng Unang Ginang Imelda Romualdez Marcos?
Kuya Andoy  :  Ay ano naman ang pakialam ko!
Teachers       :  Aba Maestro may gantimpalang dalwang libo para sa mananalong may pinakamagandang garden,milsingko sa ikalwa at isang libo para sa ikatlo!
Kuya Andoy  :  Aba'y ako ang mananalo diyan!
Teachers       :  Hahahahaha! Paano ka naman mananalo Maestro eh nakatiwangwang ang lote mo hahahaha.
Kuya Andoy  :  Ala'y basta't ako ang mananalo tapos.

     Nung kinahapunan ding iyon ay pinulong ng kuya Andoy ang apat niyang eskuwela na pinaka malapit sa school ang bahay.

Kuya Andoy  :  Gusto nyo ga'ng magka marka ng Very Good?
Students       :  Opo Sir!!!
Kuya Andoy  :  Sige pumunta kayo dito bukas ng umaga bago magbukang liwayway.
Students       :  Bakit po Sir?
Kuya Andoy  :  Wag na kayong magtanong. Basta't pumunta kayo at mamarkahan ko kayo ng Very Good.
Students       :  Opo Sir!

     Nung kinagabihang iyon ay gumising ng maaga ang kuya Andoy,mga alas-tres at dali dali siyang nagpunta sa palengke. Bumili siya ng mga naggagandahan at naglalakihang mga repolyo at bumili rin siya ng mga naglulusugang pechay at mustasa. Isinakay nya ito sa kanyang kalesa at daglian siyang pumunta sa kanilang eskuwelahan.

Kuya Andoy  :  Asan na kayo?
Students       :  Dito po Maestro.
Kuya Andoy  :  Dali,kunin nyo yung asarol at kalaykay sa likod ng puno. Asarulin nyo ang garden plot natin at tanggalin nyo ang mga damo at talahib. Pagkatapos ay kalaykayin nyo at diligan. Gusto ko'y basang basa ang lupa ha.
Students       :  Opo Sir.

     Matapos madilig ng mga bata ang lupa'y dahan-dahang ipinatong ng kuya Andoy ang mga repolyo sa basang lupa at ibinaon nya ang mga pechay sa ikalawang plot at ang mga mustasa naman sa ikatlong plot. Lahat ay maayos ang pagkaka hilera.

Kuya Andoy  :  O siya sige umuwi na kayo at bukas na kayo pumasok. Wag kayong mag-bibida miski kanino tungkol dito ha. May markang Very Good na kayo sa akin.
Students       :  Salamat po Maestro!

     At nung alas-nueve nga ng umagang iyon ay dumating na ang mga taga Kagawaran ng Agrikultura at isa-isang ininspeksyon ang lahat ng Garden Plot ng mga teachers.

Inspector #1  :  At ang nanalo para sa programang Green Revolution ng Unang Ginang Imelda Romualdez Marcos ay wala ng iba kung hindi ang garden plot ni Mr Alejandro Africa!
Inspector #2  :  Tamo naman ang mga repolyo,naggagandahan at naglalakihan! At ang mga pechay at mustasa ay kay lulusog!!!!
Kuya Andoy   :  Aba mam alagang-alaga ko naman ho ang mga yan sa dilig at abono hehehe.

     At dahil nga martial law ay kaagad na pinarangalan ang kuya Andoy sa Plaza Independencia nung kinasabaduhan at ipinagkaloob ni Mayor Carlos S. Solis ang Plaque of Appreciation at ang gantimpalang dalwang libong piso.
     Nguni't ito ang nakakatuwa, nung kinalunisang iyon pagpasok ng kuya Andoy at ng kanyang mga co-teachers: Ang mga naggagandahang repolyo -lanta na! at ang mga naglulusugang pechay at mustasa -lantutay na! Hahahaha.